Международный  Т О Т А Л Ь Н Ы Й Д И К Т А Н Т на лезгинском языке

Жувакай ихтилат

Зун гьеле дидеди хадалди, бубади са себебни авачиз ам рахкурна, маса паб къачунай. Зун халудин тевледа ханай. Бубади авур и кар дидедин мукьвабуруз гзаф залан хьана, хъел атана, адан ажугъар абуру залай къахчунай: гьич дидедин нек1един дадни акваз тутуна, абуру зун, иски пекерик кутуна, бубадин рак1арихъ гадарнай. Зи уьмур гьа саягъда рик1ин т1арвилелди башламиш хьайиди я.

Гьа макъамда чан алачир аял хайи къунши папа язухдай заз нек гуз хьана. Ирид йисахъ агакьдалди зун гьадан патав гумукьна. Ахпа са сеферда бубадиз къуншидин гьаятда зун са еке гада хьанваз акуна: «Вагь, им зи хва я хьи!»- лагьана, ада зун вичин к1вализ хутахна.

Зи буба лежбер тир, амма бахтуни чин тагузвай, крар дуьзмиш тежезвай лежбер тир. Вичин къайгъуйрин, дерди-балайрин са пай гададин к1улаз вегьез хьунал ам гзаф шад хьана. Ада гьасятда, кавхади хьиз, къургъар гуз башламишна. Адан к1вал ц1ийи аялрив ац1анвай. Вичелай гъейри масад так1ан, чин ч1уру тахай дидеди вичи чрай гьажик1адин гъуьруьн лавашар захъай чуьнуьхдай. Зун гьик1 тевледа ханат1а, гьак1 тевледа маларин патав ч1ехини хьана. И макъамдикай зи рик1ел, фитерин нидилай гъейри, са зат1ни аламач.

(Ст1ал Сулейман)